LEGAZPI CITY—Nakatalaang magkundusir an Department of Labor and Employment Bicol nin Handog ng Pangulo 2025 job fair sa Setyembre 13, 2025, Sabado, alas-8 nin aga, sa manlaen-laeng provincia sa rehiyon.
Segun ki DOLE Bicol Regonal Director Imelda Gatinao, sa intrevista kan Bombo Radyo Legazpi, gigibohon an job fair nin sabay-sabay sa ciudad kan Legazpi, Albay; sa Daet, Camarines Norte; Pili, Camarines Sur; Virac, Catanduanes; Masbate City, Masbate; asin Sorsogon City, sa provincia kan Sorsogon.
Sinabi ni Gatinao na papartisiparan ini nin 45 na employers asin nasa labi 3,000 vacant seats na trabaho an i-oofresir sa nasambitang job fair.
Igwa man sindang inimbitaran na manlaeng-laeng ahensya kan gobierno nganing tabangan na makahanap nin trabaho an first-time job seekers siring kan Bureau of Internal Revenue, Social Security System, Philippine Health Insurance Corporation (PhilHealth), Pag-IBIG, asin iba pa.
Sa nasambitang aldaw, magkakaigwa man nin salary payout kan emergency employment program na kun saen maabot sa 2,000 beneficiaries an pwedesir na makaresibe kan saindang sweldo.
Afuera digdi, ibabarewas man an haros P40 million worth of assistance sa irarom kan DOLE Integrated Livelihood Program para sa 988 beneficiaries sa bilog na rehiyon kan Bicol.
Dugang pa kan opisyal, ibabarewas man sa haros 200 interns an sweldo para sa September 1-15 na nag-avail kan Government Internship Program.
Mantang an mga benepisyaryo kan Special Program for Employment of Students (SPES), an mareresibe an 40% kan saindang sweldo gikan sa DOLE—huli sa an 60% kan saindang sweldo an itinao na kan partner employer kun saen sinda nadestino.
Dugang ni Gatinao na kadaklan sa mga abelable na trabaho na kaiba sa job fair an office jobs asin sales and services.
Mientrastanto, nagmamawot man an opisyal na dakol an magpartisipar asin dakol an ma-hire on the spot sa nasambitang aktibidad.
