LEGAZPI CITY – Nagpapadagos an pagbabarewas kan Bureau of Fisheries and Aquatic Resources Bicol nin mga fingerlings kan tilapia, hito, asin bangus sa rehiyon.
Segun ki BFAR Bicol Regional Director Pioquinto sa intrevista kan Bombo Radyo Legazpi na bago matawan nin fingerlings an mga parasisira an ipigsasa-irarom muna ninda an mga ini sa mahigot na validation nganing maaraman kun sain kaini ibubugtak an mga sira asin kun pira ang volume na dapat nindang maresibi.
Obheto suboot kan nasabing programa an pagsunod sa direktiba ni Presidente Ferdinand Marcos Jr. mapadapit sa food security asin pagdagdag nin mga produkto na hale mismo sa mga lokal na parasisira makalihis man na nanotaran ninda an pagbaba kan produksyon ngonian na taon.
Parte man kan saindang programa an nganing ma-explore kan mga parasisira an aquaculture asin makatabang sa kakulangan kan nakukuwang mga produkto sa kadagatan kan rehiyon.
Pigtaram pa kan opisyal na pighihingoa ninda an pagbabarewas nin mga fingerlings nganing maitaas an porsyento kan lebel kan aquaculture kan rehiyon Bicol ngonian na taon.
Dae dapat suboot magduwa duwa an siisay man na magdulok sa mga provincial offices kun mawot nindang mag-ataman nin mga fingerlings urog na kun igwa na sindang pagbubugtakan nganing makatabang sinda sa pagpapataas kan fish production.
Basado man sa saindang datos an uminabot na sa poco mas o menos million na an naibarewas nindang fingerlings maski dae pa nagtatapos an taon huli ta narisa ninda an pagdakol man kan mga mawot mag-ataman asin magnegosyo nin sira.
Pangapodan ni Pioquinto na aprobitsaran an saindang mga programa huli ta dae man sinda papabayaan kan BFAR Bicol pag-abot sa pangangataman kan mga fingerlings.
