LEGAZPI CITY—Nilinaw kan sarong opisyal kan Barangay Padang, Legazpi City na kumpleto na suboot an konstruksyon kan River Bank Protection Works and Drainage System sa Purok 3, Sitio Laom kan nasabing lugar.
Katakod ini kan enot nang naibareta kan Agosto 25 kun saen dae pa suboot nakumpleto an konstruksyon kan naunambitang flood control project sa nasambitang barangay.
Segun ki Barangay Padang Kapitan Harold Bembenuto, sa intrevista kan Bombo Radyo Legazpi, na an mga presenteng nagtatrabahong laborer o construction workers sa dike sa Purok 4 an bako suboot residentes kan saindang barangay, kaya pwedesir na dae ninda aram an flood control project sa Purok 3, Sitio Laom.
Dugang kan opisyal na an nagkapira man suboot sa mga residente kan saindang barangay an bako ‘aware’ sa mga detalyes kan pigsasagibong proyekto.
Kun kaya para sa kaaraman kan nagkapirang residentes, pigtawan-linaw kan kapitan na tapos na an proyekto kan drainage system sa Purok 3, Sitio Laom.
Tinawan-duon pa niya na kumpleto asin namo-monitor kan saindang barangay an mga proyekto sainda kaya nagin matrangkilo an pagkonstruir kan flood control project.
Abiso man kan kapitan sa mga residentes na yaon an saindang opisina nganing mag-monitor asin maasigurar na an mga proyektong pigkokonstruir an natatapos sa maray na kalidad.
Mientrastanto, an konstruksyon kan nasabing proyekto an saro sa mga listahan kan flood control projects na nasa Sumbong sa Pangulo website na may project description na “Construction of River Bank Protection Works and Drainage System along Purok 3 Sitio Laom, Barangay Padang, Legazpi City, Albay” asin may pondo na P96.4 milyon sa irarom kan contractor na Infra Builders And Sellers Philippines, siring man na may completion date na Setyembre 22, 2024.
