LEGAZPI CITY-Naarestar kan mga otoridad an sarong suspek sa panggagadan sa sarong babayi sa Aroroy Masbate.
Segun kay Batuan MPS Police Master Sergeant Jan-jan Guañizo sa intrevista kan Bombo Radyo Legazpi, na naarestar an suspek huli sa sarong informant asin tulos sindang nagkondusir nin briefing sa lugar ngani matunton an lokasyon kaini sa Barangay Pangle, Aroroy Masbate, kung sain tulos ining binasahan kan saiyang warrant of arrest.
An suspek sarong 47-anyos, igwang live in partner, asin nagtatrabaho sa sarong minahan.
Naarestar an suspek sa sarong joint operation kan Aroroy Municipal Police Station asin kan Provincial Intelligence Unit.
Pigkakahampang kan suspek an kasong muder huli ta saro siya sa supek sa panggagadan kan sarong babayi sa Barangay Batuan sa Masbate kung sain wara ining pigtataong piyansa.
Dati naman suboot na igwang karelasyon an suspek sa Barangay Batuan asin sa presente nasa kustodiya na siya kan Butuan Municipal Police Station para sa saiyang disposisyon.
Sinabi man ni Guañizo na nagbalik an pagtubod kan mga residente sa kumunidad sa mga kapulisan, huli sa saindang pagkaka-arestar sa mga nakatakas na personalidad asin sa igwang mga warrant of arrest.
Dakulang tabang man suboot an kumunidad sa pag-aram kan lokasyon kan mga nagtatago sa ley.
