LEGAZPI CITY – Pigtaram kan grupong kontra daya na igwang gap sa ley kasunod kan baretang may mga politiko ngonian an nagresibi nin donasyon hale sa kontratista kan 2022 Elections.
Segun ki Kontra Daya Convenor Prof. Danilo Arao sa intrevista kan Bombo Radyo Legazpi na saro sa mga gap iyo an manungod sa transparency huli ta sa presenteng panahon an dapat i-maximize an makabagong teknolohiya nganing ma-disclose real time an gabos na mga datos.
Nagtutubod man siya na magkaigwa na nin revision sa Omnibus Election Code siring man sa automated election law na dapat dae nakokompromiso an transparency asin acoountability kan pirilian.
Sa ibong kan nagsasagibo nin imbestigasyon an komisyon an dapat an may magsagibo man nin imbestigasyon na kakaputan kan mga manlain-laing pribadong grupo nganing mahiling kun may pagkaka-iba o kun may pagkakapareho sa resulta.
Tugot man si Arao na pangaranan na ngonian an mga politiko asin mga kontratistang imbwelto nganing dapat maaraman kan publiko kun siisay an mga ini asin dae man ini mabalgar sa ley.
Pagdoon niya man na magkakaigwa ini nin epekto sa integridad kan pirilian sa Pilipinas huli ta pwedesir ining magresulta sa pagbaba kan kompyansa kan taumbayan pag-abot sa komisyon, sa pirilian, asin magin sa gobierno.
