LEGAZPI CITY – Nagtutubod an sarong political science professor na pirang taon nang may nangyayaring katiwalian o pork barrel sa mga flood control projects na ipigtutugdok sa manlain-laing parte kan nacion.
Segun ki FEU Political Science Professor Francisco Riodique sa intrevista kan Bombo Radyo Legazpi na basado sa mga article kan kapwa niya mga professor kan taong 2018 na nagsasabing igwa nang mga interventions sa mga piggigibong proyekto kan Department of Public Works and Highways na bako tama.
Parte na suboot ini kan “common sense” kan namamanwaan asin kan nacion alagad naglalaom pa siya na mababago ini sa paagi kan pagpapanimbag ni Presidente Ferdinand Marcos Jr. sa mga imbwelto, kaalyado niya man ini o bako.
Nagtutubod man siya na nagagamit an proyekto para magin political tool kan mga pulitiko tuyong may eleksyon huli ta kun warang kwarta an sarong pulitiko an dae ini bobotohon kan mga tawo sa presenteng panahon.
Pagdoon man kan naunambitang professor na mapapagalan daugon sa masunod na election an mga incumbent huli ta pwedesir gamiton kan mga ini an kaban kan banwaan para sa saiyang kampanya.
Dae niya man pighahale an posibilidad na igwang involvement sa mga katiwalian sa flood control projects an nagkapirang senador asin kongresista huli ta sainda mapoon an proseso sa pagpopondo kan gabos na programa kan gobierno.
Nagigin garapalan na man suboot an mga politiko sa paghahabon nin pondo huli ta kun dati an piggagamitan sana nin mga substandard materials, ngonian an nakakapaluwas nin pondo alagad wara man ki nahihiling na proyekto o pig-aapod na “ghost projects”.
Pighayag pa ni Riodique na dapat nang panindugan kan Presidente an saiyang pagpapanimbag sa mga imbwelto sa katiwalian asin dae na magbase kun kaalyao niya ini o kaiwal sa pulitika.
