LEGAZPI CITY – Marikas na nagtalima an mga kapulisan sa banwaan kan Bato, Catanduanes sa nagin deriktiba kan Department of the Interior and Local Government manungod sa pagpapalakop kan presenya kan mga kapulisan sa mga eskwelahan.
Ini makalihis an mga kadahasan na nangyayari sa mga eskwelahan sa manlain-laing parte kan nacion kun sain may mga nairehistrong irido asin pagkagadan kan mga estudyante asin paratukdo.
Segun ki Bato Municipal Police Station Officer in Charge Police Staff Sergeant Renen Delos Reyes sa intrevista kan Bombo Radyo Legazpi na bako na bago para sainda an nasabing kasuguan huli ta kan nakaaging balik eskwela an haloy nang may naka-standby na police an gabos na eskwelahan sa saindang lugar.
Afuera suboot sa presensya kan kapulisan sa mga eskwelahan an katabang man ninda sa pagpapa-otob nin pazy orden an mga barangay tanod na nakakasakop na barangay sa mga eskwelahan.
Pigtaram pa kan opsiayal na may naka-tokang duwang pulis sa kada eskwelahan sa saindang lugar mantang may mga traffic enforcer man nganing magmando kan bulos nin trapiko sa mga kakalsadahan.
Nagin positibo man suboot an nagin reaksyon kan mga magurang asin manhamiento kan mga eskwelahan sa saindang inisyatiba huli sa pagsyerto kan kaligtasan kan mga estudyante asin paratukdo.
Sa presente an wara sindang nairehistrong aksidenteng kina-imbweltuhan kan mga estudyante asin pighihingoa ninda na magtapos an taon na namamantenir na an zero rate accidents.
Nagpapasalamat man si Delos Reyes sa mga barangay tanod huli sa magayon na koordinasyon asin pakikipagtabangan sa mga kapulisan nganing mapa-otob an pazy orden sa mga eskwelahan sa banwaan kan Bato, Catanduanes.
