Suportado kan Department of Budget and Management an propwestong i-livestream an gabos nin deliberasyon kan Kongreso para sa pambansang pondo sa masunod na taon.
Sa nangyaring Quezon Educator’s Research Convention sa Lucena City kan Sabado, Agosto 16, sinabi ni Budget Secretary Amenah Pangandaman sa saiyang mensahe na pigsusuportaran niya na gibohong mas accessible sa publiko an gabos nin budget deliberations siring man an bicameral conference committee proceedings.
Obheto suboot kaini na mas mapatibay pa an transparency asin mas aktibo an partisipasyon kan kada Pilipino sa pagbabantay sa pambansang pondo.
Sa saiya man na mensahe, ipinunto ni Secretary Pangandaman na an sektor kan edukasyon man giraray an pinakadakulang investment sa pambansang pondo sa masunod na taon.
Ipinaliwanag man kan kalihim na an edukasyon an labi pa sa sarong aligned item sa national budget kundi nagseserbi man ining “heartbeat” kan futuro kan nacion.
Sa irarom kan proposed national budget sa 2026, segun sa kalihim kabilogang P1.224 trillion an alokasyong pondo para sa edukasyon na lagpas pa sa ipigtagamang target kan United Nations Educational, Scientific and Cultural Organization (UNESCO).
Magigiromdoman kan Miyerkules, Agosto 13, opisyal nang itinurn-over kan DBM ang 2026 National Expenditure Program o propwestong pondo kan Presidente na P6.793 trillion sa Senado asin House of Representatives.
Mas halangkaw ini nin 7.4% gikan sa PHP 6.326 trillion na pambansang pondo ngunyan na 2025.
