Duwang estudyante an nasa kritikal na kamugtakan makalihis an insidente nin pambabadil sa laog kan sarong eskwelahan sa Sta. Rosa, Nueva Ecija.
Sa imbestigasyon kan pulis, an 18-anyos na lalaking suspetsado nag-abot sa eskwelahan poco mas o menos alas 10:00 nin aga asin nagduman nganing mahiling an saiyang dating nobya na sarong 15-anyos na estudyante.
Matapos na maghagad na kaulayon ini, bigla niyang binadil an daragita gamit an badil na calibre .22, asin binadil an saiyang sadiri.
Base sa enot na report, pigtutubodan na “crime of passion” an motibo kan insidente matapos na soboot nakipagbulag saiya an daragita, bagay na dai maako kan suspetsado, segun sa mga amigo kan biktima.
Parehong idinalagan sa ospital asin padagos na pigbabantayan an saindang kamugtakan.
Nagpapadagos pa an imbestigasyon kan mga pulis sa iba pang detalye mantang pighihingowa na makakua nin pahayag hale sa mga pamilya kan mga imbwelto asin sa administrasyon kan eskwelahan.
Kinondenar kan Police Regional Office 3 an insidente asin nagpaabot nin pakikidumamay sa mga pamilya.
Segun ki PRO-3 Director Police Brigadier General Ponce Peñones Jr., importanteng masierto an kaligtasan sa mga eskwelahan asin bantayan an emotional asin mental well-being kan mga jovenes.
An mga estudyante na nakaheling kan pangyayari maagi sa psychological debriefing nganing matabangan sindang makabawi sa trauma.
