LEGAZPI CITY-Magtatalaga nin nasa P360 milyon hale sa Ayuda Para sa Kapos ang Kita Program (AKAP), mga family food packs, asin iba pang mga relief item para sa mga biktima kan baha na dara kan bagyong Crising asin Habagat sa 36 na congressional district.
Kada distrito makatatanggap nin ₱10 milyon bilang direktang pinansyal na tabang para sa mga residenteng naapektaran kan pagbaha, pagebakwar, asin iba pang katakod na sakuna.
Bukod sa pinansyal na tabang, nakahanda na man an mga relief pack kairiba na an pagseserbisyo kan Tingog hot meals para sa mga evacuees na pansamantalang nagtetenir sa mga eskwelahan, covered court, asin mga evacuation centers.
Kairiba sa mga makatatanggap an mga distrito nina Reps. Franz Pumaren, Romero “Miro” Quimbo, Roman Romulo, Mark Anthony Santos, Jesus “Bong” Suntay, Marcy Teodoro, Irwin Tieng, Ralph Wendel Tulfo, Rolando Valeriano, Patrick Michael “PM” Vargas, Brian Raymund Yamsuan, Ysabel Maria Zamora, Gil Acosta, Jose Alvarez, asin Rosalie Salvame.
An pagpapaluwas kan AKAP asin relief assistance pigaayos sa opisina ni Leyte Rep. Ferdinand Martin G. Romualdez, Speaker kan 19th Congress, asin Tingog Party-list katuwang an Department of Social Welfare and Development (DSWD) sa irarom kan pamamayo ni Secretary Rex Gatchalian.
