LEGAZPI CITY – Padagos na nakamonitor an mga weather specialist sa epekto sa rehiyon Bicol an Bagyong Crising asin an Southwest Moonsoon o Habagat.
Segun ki Christian Allen Torevillas sa intrevista kan Bombo Radyo Legazpi na sa presente paali na sa extreme northern luzon kun sain nanotaran ining nasa 125 km West Northwest kan Calayan, Cagayan.
Mantinidong nasa tropical storm category pa man liwat an bagyo alagad sa kagayunan an wara nang nakabanderang tropical cyclone wind signal sa maski ano mang parte kan kabikolan.
Posibleng magluwas na suboot sa Philippine Area of Responsibility an bagyo ngonian na hapon o sa mga masunod na oras.
Mientrastanto pigtaram pa kan nasabing weather specialist na habagat na sana an nakaka-apektar sa rehiyon bicol kun sain makakaeksperyensya nin makukusog na duros nin paros partikular na sa mga coastal asin upland areas.
Laoman pa man liwat an mapanganuron na kalangitan na may kaibang pag-uuran sa mga masunod na apat na aldaw.
Kun sa madaling sabi suboot an dae pa man salbado an rehiyon sa mga raot nin panahon huli ta naguguyod kan bagyo an habagat na direktang nakakaapektar sa mga manlain-laing provincia kan kabikolan.
Pagirumdom ni Torevillas sa publiko na permihang mag-ingat partikulamente na an mga parasisira na dae na muna magpasiring sa lawod asin dae paglingawan na magdara nin payong huli man sa paburu-bagong panahon sa rehiyon.
