LEGAZPI CITY – Piglinaw kan Gobierno Provincial kan Catanduanes an nagruluwasan na reklamo mapadapit sa mga Job Orders sa kapitolyo na suboot pigpahale an mga ini.
Segun ki Governor Patrick Azanza na nasa papalitan niyang administrasyon an may kapot kan gabos na control kan transition kabale na an kontrata man kan mga ini mantang nagin malinaw sa mag-inibong na lado na sagkod sa June 15 na sana an mga job order basado man sa pinagkasunduan sa isinagibong transition meeting.
Alagad kan magtukaw na siya sa pwesto kan June 30 an may nagbayolar sa nasabing kasunduan huli ta pigpara-patrabaho pa kan nakaaging administrasyon an mga job order na lagpas na sa napag-olayan na aldaw.
Punto niya na aram na dapat suboot kan mga job orders na sa oras na nagpalit na nin liderato sa kapitolyo an may posibilidad na dae na sinda kukuwaon siring man na dae na man dapat pinaluwas na an bagong administrasyon an maraot huli sana sa pagsunod ninda sa nakatalaang pinagkasunduan.
Dugang pa kan opisyal na dapat sinabihan na kan dating gobernador na dae na maglaog pagsapit kan Hunyo 16 an mga job orders huli ta iyo na ini an napagkasunduan kan ambos lados.
Paglilinaw niya na maski may nagbayolar sa agreement an pigtao man liwat ninda an magkakanigong sahod kan mga ini komo konsiderasyon.
Pigpahalaba na man ninda an kontrata kan mga hospital based job orders nin sagkod July 15 mantang pigsasapinal sa kun siisay an dapat magtenir asin mapalitan sa mga ini.
Pagbuyagyag pa ni Governor Azanza na basado sa ipigtaong datos kan Commission on Audit (COA) na uminabot sa labi 1400 an mga job orders sa kapitolyo asin an iba sa mga ini an piggigibo na an trabaho kan mga permanenteng empleyado kan kapitolyo.
