Sinuspinde kan Land Transportation Office (LTO) an driver’s license kan internet personality asin negosyanteng si Josh Mojica, 21-anyos, makalihis ma-imbwelto sa sarong pagbalgar sa ley trapiko.
Kinumpirmar kan LTO sa saindang opisyal na pahayag na kuwa sa video an aktong pagmamaneho ni Mojica mantang pigkukuwaan an sadiri gamit an cellphone an sarong malinaw na pagbayolar sa Anti-Distracted Driving Act.
Segun kay LTO Chief Assistant Secretary Vigor Mendoza II, bako rason an klase o kantidad kan behikulo nganing balewalaon an ley.
Mahihiling sa video na in-upload mismo ni Mojica na siya an nagmamaneho kan sarong mamahaling behikulo mantang may kapot na cellphone.
Nakaguno ini nin matinding pagtuyaw hale sa netizens, na inapod an saiyang hiro na iresponsable.
Dakol an nagsabing bilang isarong public figure, dapat an nagsisirbi siyang huwaran sa saiyang mga tagasubaybay.
Basado sa Show Cause Order (SCO) na inisyu kan LTO-Intelligence and Investigation Division sa pangengenot ni Chief Renante Melitante, nahahampang si Mojica sa minasunod na mga kaso:
Reckless Driving
Paglabag sa Anti-Distracted Driving Act (Sec. 4 ng R.A. No. 10913
Being an Improper Person to Operate a Motor Vehicle (Sec. 27(a) ng R.A. No. 4136)
An ultimong kaso an pwedesir magresulta sa dagos nang pagkansela kan saiyang lisensiya.
Afuera sa suspensiyon, pigsugo man si Mojica na humampang sa LTO nganing ipaliwanag kun ngata dae siya dapat patawan nin magkakanigong administrative penalties.
Mientrastanto, isinairarom na man sa alarm list kan LTO an saiyang Porsche mantang nagpapadagos an imbestigasyon.
Si Mojica an enot na nabisto kan 2021 makalihis mag-viral an saiyang kwento kun pano siya nag-kita hale sa pagpapabakal kan homemade kangkong chips.
Poon kaidto an nagin bisto siya bilang sarong joven na negosyante asin influencer.
Ipigdoon liwat kan LTO na an kasikatan asin karangyaan an bako bastanteng rason nganing ipasipara an kaligtasan sa kakalsadahan.
 has suspended the driver’s license of internet personality and businessman Josh Mojica, 21, after he was involved in a traffic violation.){kind=link}