LEGAZPI CITY-Posibleng masuspinde o kaya bawion an mga lisensya ni actor Derek Ramsay asin an saiyang amigo na si Anthony Jude Violago huli sa suboot paggamit nin bako awtorisadong plaka sa sarong luxury sports car.
Segun sa Land Transportation Office (LTO), nagpoon an imbestigasyon makalihis na mahiling sa social media kan saindang mga tawohan an sarong Porsche 918 Spyder na may plaka na dae magkapareho sa opisyal na registration kaini, na nakarehistro ki Derek Ramsay.
Segun ki LTO Chief Assistant Secretary Markus Lacanilao, pigbago suboot ni Violago an plaka ngani magkapareho an saiyang initial na “AJV.”
Ginibo suboot ini mantang piggamit an luxury car bilang lunadan pasiring sa sarong event.
Sinabi pa kan LTO na sala asin bawal an pagliliwat o paggamit nin ibang plaka huli ta nakakapabago ini kan identity kan behikulo.
Sinuko na ni Ramsay an Porsche na yaon ngonian sa kustodiya kan LTO mantang nagpapadagos an imbestigasyon.
Isinuko man ni Violago an saiyang lisensya sa pagmaneho.
Segun sa LTO, parehong naghagad nin dispensa si Ramsay asin Violago asin inako an saindang sala.
Nasa P5,000 na multa an bako tamang pagkakabit kan awtorisadong plaka nin motor vehicle.
Sa ibong kaini, posibleng mag-atubang nin mas magabat na penalidad an duwa, kabali na an 90-day preventive suspension asin posibleng permanenteng suspension kan saindang mga lisensya, depende sa desisyon kan LTO Intelligence Division.
Si Ramsay asin Violago pinagsugo na mag-atubang sa LTO sa Agosto 24 ngani ipaliwanag an saindang lado.
