Piglalaoman kan kampo ni dating Presidente Rodrigo Duterte na maluwas nin desisyon an International Criminal Court (ICC) sa hirit nindang interim release sa laog nin sarong bulan.
Sinabi kan lead counsel na si Atty. Nicholas Kaufman na dapat marikas na maghiro an ICC basado sa Rome statute.
Plano man kan depensa na maghagad nin permiso na makapagsumiter nin simbag sa argumento kan prosekusyon na kontra sa paramientras na paglibre ni Duterte, huli suboot sa pagbago kan nacion na pagteteniran kaini.
Ipigdoon ni Kaufman na wara siyang rason nganing kuwestiyunon an integridad kan mga hukom kan ICC, maski ninigaran an saindang kahagadan na idiskwalipikar an duwang judge na imbuelto sa naenot na drug war probe.
Aminado ini na mawot kuta kan kampo na makabalik si Duterte sa Pilipinas maski paramientras, alagad malinaw na dae ini tatanggapon kan gobyerno.
Pignigaram man kaining kumpirmaron an report na sinayumahan kan Belgium asin Australia na tanggapon si Duterte, asin sinabing may kalibongan sana sa impormasyon.
Pinahimutikan man ni Kaufman an suhestyon na pwedesir maghagad nin legal na proteksyon si Duterte sa irarom kan ley kan Netherlands mantang nasa kustodiya kam ICC—na nagtutukoy sa enot nang sinabi kan nagkapirang abogadong Pilipino.
