Nadukayang gadan an sarong babae sa sarong payag sa Salinungan East, San Mateo, Isabela.
Segun sa agom kan biktima na si Jayson, naghale sana ini sa saindang kubo nganing magbakal nin pagkaon alagad kan magbalik, gadan na an saiyang agom.
Sinabi niya na an saiyang agom naggamit nin gasolina hale sa grasscutter asin sinulo an saiyang sadiri.
Bako man suboot ini an enot na bes na nagporbar na kitilon an buhay kaini huli ta dati na ining nagporbar na magkaon nin pesticide alagad nakarecover.
Nangengenot man sa imbestigasyon dapit sa insidente an BFP, SOCO asin PNP mantang dinara na sa sarong punerarya an bangkay kan biktima.
Nadipisilan man na kuwaon kan rescue team an bangkay kan babae huli ta kinaipuhan nindang agihon sa sarong pilapil.
Napag-araman na dating Barangay Nutrition Scholar kan Barangay Ignacio, San Mateo, Isabela an nasambitang babae.
Segun ki Kapitan Deogracias Cabiles, dating matali an babae alagad padiit-diit na nagbago an saiyang gawi kaya napiritan an Barangay na palitan siya.
Sinabi pa kaini na base sa saiyang mga nakaaging pakikipag-olay sa agom kan nagadan na babae, posibleng huli sa epekto kan pesticide na ininom kan biktima an kakaibang gawe-gawe kaini sa ibang opisyales kan Barangay kan siya nagseserbi bilang BNS.
Dae na man nin plano an agom ni Jayson na ipsairarom sa otopsiya an bangkay kan saiyang agom huli ta kumbinsido ining warang foul play sa insidente.
