Pinuonan na kan Office of the Ombudsman an preliminary investigation sa suboot salang paggamit kan confidential funds kan Office of the Vice President asin Department of Education (DepEd) sa irarom ni Vice President Sara Duterte.
Nagpuon an imbestigasyon kan Ombudsman sa isinumiter na Committee Report kan House Committee on Good Government and Public Accountability na pinangengenotan ni Representative Joel Chua sa opisina kan Ombudsman.
Kaya itinalaga kan Ombudsman bilang “nominal complainant” sa nagpapadagos na imbestigasyon si Rep. Chua na kumakatawan sa nasabing komite.
Afuera ki VP Sara, kaiba sa mga pinangaranang respondent sa reklamo asin isinugong magsunad kan saindang counter-affidavits an limang opisyal kan DepEd na sinda special disbursing officers Edward Fajarda asin Gina Acosta; assistant secretary Sunshine Charry Fajarda, director for Strategic Management Office; retired Maj. Gen. Nolasco Mempin, undersecretary for Administration Annalyn Sevilla, undersecretary for Finance Service.
Ipigsugo man na magsumiter kan saindang counter-affidavits an apat na opisyal kan OVP kaiba an chief of staff ni VP Sara na si Usec. Atty. Zuleika Lopez, assistant secretary and assistant chief of staff Lemuel Ortonio asin Lt. Col. Dennis Nolasco asin Col. Raymund Dante Lachia kan Vice Presidential Security and Protection Group.
Kinumpirmar man kan OVP na naresibi na kaini an order gikan sa Ombudsman na magsimbag sa reklamo kan Kamara may kinaaraman sa suboot maanomaliyang paggastos kan confidential fund.
Alagad nilinaw man kan tagapagtaram kan House of Representatives na si Atty. Princess Abante na dae suboot complainant an Kamara sa kaso laban sa Bise Presidente na nasa Office of the Ombudsman.
Pwedesir suboot pig-aaksyunan sana kan Ombudsman an committee report na in-adopt kan House na nagrerekomenda na magsunad nin mga kaso laban sa Bise Presidente alagad nilinaw na bako suboot nagsunad nin complaint an Kamara.
