LEGAZPI CITY – Nagin matuninong asin salbado an assessment kan kapulisan katakod kan pagbubukas kan klase para sa School year 2025-2026 sa provincia kan Sorsogon.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na huli ini sa isinagibong koordinasyon kan mga lokal na gobierno asin kapulisan nganing matawan ini nin preparasyon.
Nahiling kan mga estudyante asin magurang na igwang police visibility sa mga eskwelahan asin pedestrian lane nganing magpaotob nin pazy orden sa manlain-laing lugar kan provincia.
Nagkondusir man nin visitation an saindang provincial director sa darakulang eskwelahan sa Sorsogon City asin nagkaigwa nin konsultasyon sa mga school principal nganing maaraman an pwedesir pang maitao kan kapulisan sa mga ini.
Nanindugan an opisyal na hasta matapos an school year an magpapaotob sinda nin mahigpit na seguridad nganing magin kampante an mga magurang kada malog an saindang mga aki sa eskwelahan.
Nagsagibo na sinda nin memorandum agreement sa deped nganing magsagibo nin regular na pagbisita asin pagkonsulta sa mga eskwelahan sa saindang nasasakupan.
Pagirumdom ni Destacamento sa mga estudyante na mag-adal nin maray asin sa mga magurang na bantayan an saindang mga aki asin tulos na magsumbong sa sainda enkaso may mapansin na kaduda-duda sa saindang lugar para sa amay na pagresponde kan kapulisan.
