LEGAZPI CITY – Uminabot na sa 78 an mga election related complaints na naresibi kan Commission on Elections Bicol sa kakatapos pa sanang 2025 Midterm Election.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na pira sa mga naireport na mga complaint iyo an mga insidente nin pambabadil, panghaharang sa tinampo, panghaharass, kidnapping, asin attempted murder na pararehong nangyari pirang aldaw antes an pirilian.
Nakarehistro man sinda nin reklamo mapadapit sa vote buying, abuse of state resources sa paagi kan email, social media, Philippine National Police Bicol, asin sa saindang citizens hotline.
May mga pinadarahan na man sindang show cause order asin subpoena sa mga respondents mantang pighahalat man ninda an mga counter affidavit kan mga napadarahan nganing maresolba an saindang mga kaso.
Paglilinaw man kan opisyal na maski nanggana o naperdi an sarong kandidato an ipapadagos ninda an kaso bilang parte kan proseso mapadapit sa bayolasyon na saindang nakomiter.
Sa ibong kan mga nairehistrong numero an masasabi man ninda liwat na nagin generally peacefull an pirilian huli ta dae man ini nakaapektar sa pagsasagibo kan botohan asin proklamasyon sa mga nangganang kandidato.
Nagtetenir na palaisipan suboot na may mga ginadan pirang aldaw antes an pirilian alagad dae man naikonsidera bilang election related incident kun kaya dapat hilingon kun may motibo sa paggadan an pigasuportaran kaining kandidato.
Pigtawan doon ni Atty. Valeza na ini an enot na bes na warang nairehistrong kariribukan o pambabadil asin maski anong insidente sa mismong aldaw kan pirilian sa rehiyon huli sa mahigot na pagbabantay kan mga law enforcement agencies.
