LEGAZPI CITY—Suminakat na sa labi 6,000 an inbound asin outbound passengers an nairehistro kan Coast Guard District Bicol sa mga pantalan kan rehiyong Bicol ngunyan na Semana Santa.
Segun ki Coast Guard District Bicol PIO CG Ensign Alyzza Novie Bermal, sa intrevista kan Bombo Radyo Legazpi, an provincia kan Sorsogon an pinakadakol na nairehistrong biyahero na igwang haros 2,000 pasahero.
Piglalaoman man na madoble pa an numero kan inbound asin outbound passengers na maagi sa mga pantalan sa Bicol sa mga masunod na aldaw.
Dugang kan opisyal na an Philippine Coast Guard nagtatao nin asistensya sa mga pasahero urog na sa mga pasaherong may special needs asin senior citizens.
Pigpapahigot man kan ahensya an saindang pagbabantay siring kan pag-inspeksyon sa mga pantalan, kargamento, lunadang pandagat para man sa seguridad kan mga pantalan.
Mientrastanto, nagpagiromdom man an opisyal na magin maingat sa saindang pagbiyahe, magsunod sa mga mandato na ipigpaotob kan mga otoridad, asin aramon an mga numerong pwedesir na kontakon en kaso may emerhensya.
