LEGAZPI CITY—Nakapag-isyu na an Land Transportation Franchising and Regulatory Board Bicol nin kadugangang 131 na special permits sa public utility buses nganing masimbagan en kaso dakol na pasahero an mauli sa rehiyon kan Bicol ngonian na Semana Santa.
Segun ki Land Transportation Franchising and Regulatory Board Bicol Regional Director Joel Defeo, sa intrevista kan Bombo Radyo Legazpi, an nasabing 131 na permits an afuera pa sa regular na mga nagbabiyaheng bus na may regular na prangkisa gikan sa Manila-to any points of Bicol Region.
Dugang pa kan opisyal na na-release na sa kanya-kanyang operators an nasabing 131 na special permits kan public utility buses.
An pagtao nin special permits iyo ngani na magin lehitimo an biyahe kan mga bus sa luwas kan hurisdiksyon kan rehiyong Bicol asin ngani bakong masabi na kolorum an pigpapasadang bus.
Sinabi pa kaini na en kaso dae tatawan nin special permit, an magigin ruta ruta kan mga bus iyo sana an sa laog kan Bicol.
Mientrastanto, nangapudan man ini sa mga pasahero na siertohon na lehitimo asin bako sa kolurum an saindang lulunadan na behikulo ngani maibitaran an ano man na aberya sa saindang biyahe.
