LEGAZPI CITY—Nakuwaan nin ladawan an sarong lalaking soboot buminadil sa 78-anyos na lolo na si Felizardo Collantes, sarong paraoma asin nagpapataya sa jueteng, sa Barangay Buang, sa ciudad kan Tabaco, Albay.
Segun ki Michael Collantes na aki kan biktima, sa intrevista kan Bombo Radyo Legazpi, na susog sa mga nakahiling kan insidente an lalaki nakasulog nin bonet asin naka-helmet mantang lunad ini sa sarong motorsiklong kulay itom asin may sticker na kulay pula sa tahaw kan saiyang motor.
Sinabi pa kaini na kan pauli na an biktima inapod ini kan lalaking nakamotorsiklo ngani na magtaya sa jueteng, sagkod sa uminabot sa punto na tinutukan na ini nin badil.
Nakiolay pa man an biktima na dae siya pagbadilon alagad dae nagduwa-duwa an lalaki na paputukan ini nin duwang beses na nagresulta sa pagkagadan kaini.
Sagkod sa ngonian palaisipan pa an motibo kan pambabadil sa biktima.
Mientastranto, nangangapudan man ngonian an pamilya kaini na kun siisay man an nakabisto sa lalaking nambadil na tulos makipagkoordinar sa mga otoridad ngani na matabangan na makua ninda an hustisya.
