Karsel an bagsak kan sarong estudyante makalihis na makuwaan nin ilegal na droga sa Barangay Kilicao, Daraga, Albay.
Segun ki Daraga Municipal Police Station Public Information Officer Police Lieutenant Ma. Isabel Nopia sa intrevista kan Bombo Radyo Legazpi na makalihis an isinagibong test buy kan saindang operatiba tulos nindang ikinasa an buybust operation nganing madakop an nasambitang suspetsado.
Nakumpiska sa Street level individual na estudyante an apat na sachet kan pigtutubudang shabu asin pigkakarkulong may estimated value na poco mas o menos 42,000 pesos.
May nakuwa man na sadit na digital weighing scale na pigtutubudang piggagamit sa pagpapabakal nin mga kontrabando.
Pigtaram pa kan opisyal na posible man suboot na may kasabwat an suspetsado urong nang may pigkukuwaan ini kan saiyang mga pigpapabakal sa mga parokyano kaini.
Sa presente, nagtetenir sa kostudiya kan Daraga Mps an suspetsado para sa magkakanigong disposiyon mantang mahahampang ini sa kasong pagbayolar Acta Republica numerado 9165 o an dangerous drugs act of 2002.
Padagos man suboot an saindang pag-monitor nganing masawata an mga ilegal na gawi asin aktibidad na nangyayari sa saindang banwaan.
Patanid kaini sa mga magbabalong magpuslit nin ilegal na kontrabando na wara sindang puwang sa Daraga huli ta gigibuhon ninda an gabos nganing madakop an mga ini.
