LEGAZPI CITY – Pwedesir isuspende kan Albay Schools Division Office an face to face classes sa provincia enkaso maghalangkaw pa an heat index.
Magigirumduman na susog sa trajectory kan state weather bureau, piglalaoman na poco mas o menos 50 degrees celcius an ma-eksperyensyahan na init sa hawak sa Albay.
Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na pigbabasehan ninda an mga parameters na pigpapaluwas kan mga state weather bureau sa pagdeklara kan mga suspensiyon kan klase.
Igwa sindang pigsusunod na mga department order kun sain madeklara na sinda nin suspenyon kan face to face classes enkaso magpakol sa 42 degrees celcius pataas an heat index sa provincia.
Pigtaram pa kan opisyal na nasa mga school heads na man suboot an hurisdiksyon mapadapit sa mga pwedeng suluton kan mga estudyante enkaso magtaas pa an heat index sa Albay.
Igwa man na susunudon an mga paratukdo na saindang susuluton urog na kun dae ninda gagamiton an saindang mga uniporme arug kan mga bado na may marka kan departamento.
Yaon man giraray an saindang konsiderasyon sa mga estudyante asin paratukdo basta’t syertuhon sana suboot na disente asin nahihiling na yaon sinda sa sarong institusyon kan edukasyon.
Pagirumdom ni Tena sa gabos na mag-ingat asin permihang mag-antabay sa mga advisory kan mga state weather bureau huli ta dyan sinda nakabase kan saindang abiso na ipapaluwas para sa saindang nasasakupan.
