Binawian na nin buhay an dating Philippine Men’s Football National team coach na si Sven-Goran Eriksson sa edad 76-anyos.
Segun sa kampo kan nasabing coach na pancreatic cancer an rason kan pamamaaram kaini.
An Swedish manager an namayo sa Azkals puon 2018 hanggang 2019 na nagdara sa Asian Cup sa enot na bes.
Pinangenotan niya an Azkals sa semifinals kan 2018 AFF Championship asin nagpalyar sa champions na Vietnam.
Si Eriksson an pinakahalangkaw na profile manager kan Azkals huli sa 40 taon na managerial experience kan magbali siya sa Pilipinas, kaibanan an limang taon sa England Men’s National Football team puon 2001-2006.
Pinamayuhan man kaini an England na uminabot sa quarterfinals kan 2002-2006 World Cup asin 2004 Euros.
