LEGAZPI CITY – Pangapudan ngunyan kan grupong Alliance for Health Workers na maitao nin tama an mga allowances asin iba pang benepisyo na nakatagama para sa mga health workers.
Ini makalihis an ginibong pagbisita kan grupo sa Bicol Medical Center asin Bicol Regional Training and Teaching Hospital (BRTTH) ngani na kumustahon an sitwasyon kan mga medical frontliners.
Sa intrevista kan Bombo Radyo Legazpi kay Robert Mendoza an presidente kan AHW, dakol na mga datos na pigpapaluwas an Department of Health (DOH) dapit sa nai-release na pondo kaya mawot nindang masierto kun totoo na natatawan nin ayuda an mga health workers.
Basado sa pagbisita sa BRTTH, sinabi ni Mendoza na nagin magayon man an koordinasyon asin updated an allowances kan mga health workers puon kan Enero hasta Hunyo ngunyan na taon.
Tinawan duon pa kan grupo na dae dapat na ipasipara sana kan DOH an reklamo kan mga frontliners urog pang dakulang sakripisyo an pigigibo kan mga ini sa panahon kan pandemya.
Mientras tanto, plano man kan Alliance for Health Workers na magkasa nin hiro-protesta ngani na kalampagon an health department ngani na mai-release na an One COVID-19 Allowance (OCA) asin Health Emergency Allowance (HEA) na haloy na suboot na naka-tengga asin dae pigigibuhan nin paagi kan ahensya.
