LEGAZPI CITY- Naging matrayumpo an isinagibong Mt. Mayon Triathlon 2022 sa ciudad nin Legazpi na matoninong man na natapos asin inatindiran kan nasa 300 na mga partisipantes.
Sa intrevista kan Bombo Radyo Legazpi kay PSO Legazpi Admin Officer Cyril Nacion, ipinagpapasalamat kaini na wara man nin naireport na dae pinaglalaomang insidente asin salbado na nakatapos ka kompetisyon an gabosna atleta.
Nagkaigwa sana nin diit na problema dara kan makusog na pag-uran kung kaya naatras nin saro oras asin alas 7 na nin pagkaaga napunan an aktibidad.
Haros gabos man sa mga partisipantes an nagibong matapos an Triathlon na kompwesto nin 1.5km para sa swimming, 40km sa biking asin 10Km man para sa running.
Nangenot sa kompetisyon si John Chicano haling Olongapo na natapos nin duwang oras asin apat sanang minuto.
Makalihis na makaabot sa finish line an gabos na mga partisipantes, matoninong man na nagsihalian an kadakol na katawong nag-atindir asin nakisabay sa nasabing aktibidad.
