LEGAZPI CITY- Nagtutubod si Presidential Adviser on Bicol Affairs Usec. Marvel Clavecilla na igwang integridad an liderato ni dating Land Transportation, Franchising and Regulatory Board (LTFRB) Bicol Director Jun Abrazaldo.
Sa intrevista kan Bombo Radyo Legazpi ki Usec. Clavecilla, igwang nagkapirang dae pinagkasinabutan sinda Abrazaldo asin LTFRB chair Martin Delgra III urog na sa operasyon sa ahensya.
Segun pa digdi na posibleng ‘power play’ an nangyari asin labing nakakapanghinayang an pagkatangkas sa sarong matibay na lider.
Inomaw pa kan opisyal an pagsakat kan revenue collection kan ahensya sa laog sana nin anom na bulan na pagsisirbe ni Abrazaldo sa P22 million puon P7,000 sana kan paglaog huli sa matrayumpong mga anti-colorum operation sa bilog na rehiyon.
Pagbuyagyag pa ni Clavecilla na enot nang ipighayag ni Chairman Delgra na nagdemiter sa pwesto si Abrazaldo alagad ipigduon kan dating direktor na dae man nagsumiter nin resignation letter.
Magigirumduman na ipighayag pa ni Delgra sa turnover of command ki newly-installed LTFRB Bicol Dir. Vladimir Cahulugan na igwang kinaaraman sa korapsyon an paghale sa dating direktor na ipignigar man ni Abrazaldo.
Mientras tanto, nag-apelar man si Abrazaldo sa oficina ni Transportation Secretary Arthur Tugade katakod kan isyu.
