LEGAZPI CITY — Nanlumo an sarong negosyante na hale pa sa Bacoor, Cavite makalihis na mahabasan sa pigtetenir na resort sa banwaan kan Sto. Domingo, Albay.
An biktima na si Arvin Lombos, 34-anyos asin distributor nin food supplement asin health care products na paramientras na nagtenir sa sarong resort (Las Aguas Beach Resort) sa Barangay San Vicente an nahabasan kan dae pa nabibistong suspek.
Sa intrevista kan Bombo Radyo Legazpi ki Pol. S/Insp. Genevieve Oserin, hepe kan Sto. Domingo PNP, Mierkules Santo kan mangyari an insidente kun sain naghiling sana suboot nin prusisyon si Lombos alagad pagbalik kaini, wara na an mga paninda asin ibang gadgets na pigkakarkulong maabot sa P68,550 an bilog na kantidad.
Segun ki Oserin, tibaad pigsubaybayan na an biktima kun kaya tienempo kaini na wara sa cabana si Lombos ngani isagibo an panhahabas.
Blangko pa an pulisya sa mag kagibuhan kan insidente huli sa maski CCTV footage, warang maipahiling an resort na dakula kutang tabang sa pagresolba sa kaso.
Mientras tanto, kasunod kan insidente, naglibot na sa kada resort sa banwaan an PNP ngani ipaabot an pangyayari. Nagkondusir man nin inspeksyon kun sain solamenteng an nahabasan na resort suboot an wara nin naka-install na CCTV camera.
