LEGAZPI CITY- Piglalaomang makakauli na sa kani-kaniyang harong sa paglaog kan Abril an mga residenteng nagtetenir pa man giraray sa evacuation centers huli sa Mayon volcano activity.
Katakod ini kan naobserbaran na ‘downward trend’ sa aktibidad kan bulkan sa duwang semanang pagbabantay makalihis na ibaba sa Alert Level 3 status kaitong Marso 6.
Segun ki Philippine Institute of Volcanology and Seismology (PHIVOLCS) resident volcanologist Ed Laguerta, tolong aldaw na suboot na nagpundo an bulos kan lava mantang nagpapadagos man an geodetic asin geochemical survey sa iba pang parametro.
Sa ibong na lado, mantenido suboot na high-risk area an 6-kilometer Permanent Danger Zone dawa pa ibaba an Mayon sa Alert Level 2 kaya hagad ni Laguerta an long-term solution.
Mientras tanto, dawa pa makabalik na sa saindang mga harong an mga residente maikokonsiderar pa man na economically displaced an mga ini urog na an mga naglalaom sa oma sa PDZ.
