LEGAZPI CITY- Kabado na suboot an 13-year old Pinay singer na si Shaniah Rollo sa paglaog kan bulan kan Marso na kasabay man kan pig-aabangan na pagluwas kan resulta kan deliberasyon kun makakalusot sa semifinals kan binalehang Ireland’s Got Talent.
Sa intrevista kan Bombo Radyo Legazpi ki Shaniah, ipig-aagi na sana suboot kaini sa pangadye an gabos na kurab mantang ikinakaogma asin nagpapasalamat sa mga naghahayag nin pag-omaw asin suporta.
Aram man ni Shaniah na afuera saiya na nangangaipo nin suporta asin kusog nin boot, pigrurumdom man kaini an mga kahimanwang Albayano asin dawa na pagal pa sa pagkanta makalihis an nagkapirang aldaw na pagkakaigwa nin abo, kalintura asin sipon, nag-alay ini nin kanta para sa Mayon evacuees.
Naglalaom man ini na maitatao an pinapangarap na trayumpo para sa mga kahimanwang Albayano asin matawang-kaogmahan an mga ini sa ibong kan namamateang krisis sa pag-aalburoto kan bulkang Mayon.
