LEGAZPI CITY- Arestado na kan mga otoridad an mag-agom na senior citizen huli sa sumbong nin panloloko kontra sa mga ini sa Purok 5, Brgy. Bonga, banwaan kan Bacacay, Albay.
Binisto an mga nasabing persona na sinda Ernesto Panti, 69 anyos asin esposa kaining si Edith Panti, 68 anyos na anas residente kan Brgy. Codon sa banwaan kan San Andres Catanduanes.
Isinagibo an operasyon sa bisa kan mandamiento de aresto na ibinaba sa sala ni Judge Genie Gapas Agbada kan Branch 42 sa banwaan kan Virac sa Catanduanes sa krimen na illegal recruitment.
Napag-araman pa na afuera sa nasabing kaso, nahahampang pa si Ernesto sa krimen kan economic sabotage base sa ibinabang warrant of arrest kan 2014 sa sala ni Judge Lelu Contreras kan RTC Branch 43 sa Virac mientras na saro pa para sa apat na counts nin estafa.
Sa ngonian, temporalmenteng nagtetenir sa custodial facility kan Bacacay Municipal Police an mag-agom asin nakatalaang hampangon an ipigsunad na patong-patong na kaso kontra sa mga ini sa pagdangog sa korte.
