LEGAZPI CITY— Dae nakasalbar sa kagadanan an sarong lola asin duwang apo kaini makalihis na magbungkaras an bakbakan sa pagultanan kan pwersa kan gobyerno asin kan rebeldeng grupong New People’s Army (NPA) sa Sitio Lubigan, Brgy. Panan Awan, banwaan kan Cawayan, Masbate.
Sa report gikan sa Police Regional Office 5, nagkaigwa in engkwentro an pwersa kan 3rd Scout Ranger Company kan Philippine Army na pinamamayuhan ni Lt. Karlito John Cabillo asin pigkakarkulong pitong miyembro kan NPA sa nasambitan na lugar kun sain nakatugdok an sarong payag.
Sa nasambitan na oras, nasa laog suboot kan harong an sarong 70-anyos na lola na binistong si Lolita Pepito kaibanan an babayi asin lalaking apo na edad 11 asin 9-anyos.
Nagsapar an mga ini nin tama nin bala sa manlaen-laen na parte kan hawak na nagresulta sa tulos na pagkagadan mantang nagsapar nin tama sa walang braso an saro pang 70-anyos na lolo na si Paulino Pepito.
Dae man nin nairehistrong casualty sa lado kan mga soldados mantang pigkukumpirmar pa kun pira sa lado kan mga rebelde.
Sa ngunyan, pinaghahanap pa an mga rebelde na nagdalagan sa bulod na parte kan lugar mantang dae pa nin ipinapaluwas na pahayag an liderato kan 9th Infantry Division ng Philippine Army siring man an Southern Luzon Command kan Armed Forces of the Philippines (AFP) sa nasambitan na insidente.
Magigirumduman na kasuudma, nagbungkaras man an duwang magkasunod na engkwentro sa magkaharaning banwaan kan Uson asin Cawayan kun sain nakapagrehistro nin sarong iridong pulis sa enot na banwaan na nasa salbado nang kamugtakan susog na man sa report ni Masbate PNP Director PS/Supt. Froilan Elopre.
