LEGAZPI CITY — Balik na sa kustodiya kan Masbate Provincial Jail an sarong presong nakapuga makalihis an matiyagang paghanap kan mga otoridad digdi.
Enot kaini, napag-araman na nagsairarom sa medikasyon sa Masbate Provincial Hospital si Guillermo Razon, 56-anyos kan magibo kaining takasan an saiyang custodial officer.
Tulos man na inalerto kan nasambitan na opisyal an mga kaibanan kaini sa marikas na paghanap sa preso kun sain isinagibo an police visibility patrol.
Naarestar ini sa patrol operation asin dinara muna sa Dimasalang Municipal Police para sa medical examination antes na iturn-over sa prison guard kan Masbate Provincial Jail para sa magkakanigong disposisyon.
Napag-araman na nakulong si Razon makalihis na sangatan nin kasong Slight Physical Injuries asin pagbalgar sa Republic Act 7610.
