LEGAZPI CITY — Nakatutok ngunyan an Environmental Management Bureau (EMB) Bicol sa pag-monitor sa paros, tubig asin solid waste management kan manlaen-laen na syudad asin probinsya sa rehiyon.
Katakod kaini, ipighayag ni Dra. Eva Ocfemia, EMB Bicol Regional Director na susog sa saindang nagunong datos, nasa “good level” pa an paros sa Legazpi City.
Alagad nakakaapektar man suboot an mga alpog na dara kan mga road construction.
Dugang pa ni Ocfemia, igwa nin sarong grupo na matutok sa syudad ngani na hilingon an kalidad kan paros siring na man an mga elementong ipigbubuga kan mga behikulo na pwedesir na magkontribuir sa air pollution.
Isasagibo man suboot ini sa mga syudad kan Naga asin Iriga.
Ipigheras pa kan opisyal na saro pa sa saindang mga programang pigtututukan ngunyan an Anti Smoke-Belching Campaign katabang an Land Transportation Office (LTO) espesyalmente ngunyan na summer season.
Padagos man suboot an saindang pag-monitor sa pitong banwaan sa Albay na nasangatan nin reklamo kan Environmental Ombudsman huli sa pagbalgar sa RA 9003 o an Ecological Solid Waste Management Act siring man an ipigrereklamong poultry farm sa Guinobatan huli sa mabatang parong.
Sa ngunyan, pangapodan ni Ocfemia sa publiko na makikooperar asin aramon an mga responsibilidad sa pag-ataman sa kapalibutan.
