LEGAZPI CITY- Pigtutubudan na atake sa puso an ikinagadan kan sarong padi na nadukayang wara nang buhay sa Home for the Clergy, Barangay Bibincahan, Sorsogon City.
Sa impormasyon na ipinaabot sa Sorsogon City Police, pigsasabing inatudan nin pamahawan kan ministrong si Henry Diesta, 47-anyos an padi na binistong si Father Leonardo Monje, 79-anyos alagad makalihis suboot an pirang oras, namalisyahan kaining dae kinaon kan padi an saiyang ipigpreparar na pagkakan.
Digdi na nagduda si Diesta kun kaya nagsirip sa bintana kan kwarto asin duman nahiling dae na naghahangos an padi.
Huli digdi, saiyang inapod an ibang kaibanan asin pwersahan na binukasan an kwarto ni Father Monje.
Sigon man sa tugang kaini na si Dr. Norberto Monje, igwa ini nin helang na hypertension, diabetes asin problema sa puso alagad nagsayuma nang mag-inom nin bulong.
Nagdesisyun an nasambitan na doktor asin an saindang pamilya na dae na ipagsairarom sa otopsiya an nagadan na kaparientes huli ta dakula an saindang pagtubod na massive heart attack an nangyari ki Father Monje urog pa na dae man ini nahilingan nin ano man na marka nin lugad para sa posibilidad nin foul play.
