LEGAZPI CITY – Wara man suboot na magiginibo an Bureau of Jail Management and Phenology (BJMP) Bicol kundi akuon an mga personahes na imbwelto sa pagbayolar nin ley na ipigkokomiter kan korte sa ibong kan congested na mga pasilidad.
Segun ki Jail Senior Inspector Joseph Lucila, ini an pigpo-problema ninda ngunyan huli sa halangkaw an porsyento kan congestion kan presuhan urog na suboot ngunyan na papaabot na an tag-init.
Huli digdi, mahigot na tinawan nin direktiba ni BJMP Bicol director Jail Senior Supt. Ignacio Sarabia-Panti an mga warden na magibo nin lakdang ngane na maibsan o mabawasan an presenteng kamugtakan kan mga residentes kan presuhan.
Kasabay kaya kan tag-init asin congested na pasilidad an mag-okurang problema sa salud kan mga preso.
Pigtututukan ngunyan ninda an mga kahelangan arog kan sore eyes kun kaya nakaplano naman suboot nin mga lakdang an health service.
Aminado man an opisyal na bako talagang supisyente asin bako angay an pasilidad ninda ngunyan.
Mawot man suboot kan saindang manhamiento na matawan nin tyansa an mga residentes na maging makatao an pag-istar sa lugar alagad dae man ninda ini maitao paramientras huli sa kawaran nin pasilidad.
Segun pa ki Lucila, magayon suboot kun natawan nin atensiyon an magiging resulta kan lakdang kan administrasyon huli sa kun dakol an madadakop, dakol man na espasyon an kinakaipuhan ngane maakomodar an mga ini.
Alagad positibo man an opisyal na naggigibo na nin propuesto an gobyerno ngane masolusyunan an problemang pigkakahampang ninda ngunyan.
