LEGAZPI CITY – Nabiktima nin “modus operandi” ngunyan kan mga budol-budol an sarong paratienda nin manok sa syudad kan Ligao.
Binisto an biktimang si Ariel Septimo, 21 anyos, residente kan Brgy. Barcelonita, Cabusao, Camarines Sur asin paratienda sa sarong branch nin manukan sa nasabing syudad.
Base sa inisyal na imbestigasyon kan pulisya, sarong dae pa namimidbidang lalaki an nag-order suboot nin 3 pidasong fried chicken na nagkakantidad nin P630.00 na dadarahon suboot sa Ligao Parish Church.
Segun sa biktima, tinugon siya kan parabakal na magdarang pang-uli sa P3,000 na ibabayad saiya oras na maideliver an fried chicken.
Kan maihatod suboot an manok, sinubli kan suspek an saiyang cellphone ngane na kopyahon an numero kan kura paroko.
Hinagad naman suboot kan suspek an uli na nagkakantidad nin P2,370.00 ngane na maibalik na sana sa biktima an bayad asin cellphone.
Makalihis maitao an cellphone asin kwarta, naghali na suboot an suspek ngane magpasiring sa kura paroko alagad dae na ini nagbalik pa.
Sa ngunyan, pig-iimbestigaran pa kan mga otoridad an nangyaring insidente.