LEGAZPI CITY – Nagpupuon nang mag-ako nin mga entries an Civil Service Commission (CSC) para sa taunang Search for Outstanding Government Worker 2017.
Pwedesir na makabale sa nasambitan na aktibidad an gabos na elective asin appointive officials, permanent, contractual asin temporary employees kan gobyerno.
Segun ki Sharon Flores, division head kan Public Affairs and Liason Office kan CSC Bicol, pwedesir na mainominar an opisyal sa tulong kategorya kaibanan na an Presidential Lingkod Bayan award, PAGASA award asin Dangal ng Bayan award.
Makakasabay man sa nominasyon an mga opisyales na makakapagsumiter nin mga rekisitos kun saen saro na digdi an 3 taong padagos na serbisyo sa gobyerno, very satisfactory o equivalent rating para sa duwang taong rating period antes an nominasyon asin kaipuhan na warang kinahampang o pigkakahampang na kaso mapa-administratibo o kriminal man.
Oras na makasumiter kan mga rekisitos, segun ki Flores, ma-evaluate pa sinda kaini asin papaisihon na sana an grupo o indibidwal kun nakapasar o dae.
An mga kulang na dokumento an pwedesir man suboot na madiskwalipika kun kaya pig-abisuhan kan opisyal an mga government workers na magsumiter antes pa an deadline sa Marso 31.
An mga mapipili sa regional level na opisyal an ii-endorso kan CSC sa national level kun saen an magigin national awardee an makakaresibe nin cash prize, gold yielded medallion asin igwa pa nin pribelehiyo na executive check up.
Saro pa sa magayong benepisyo kan pagigin awardee iyo an maserbi ining one-step promotion sa masunod na halangkaw na posisyon.
Segun pa ki Flores, an aktibidad na ini an patotoo na bako sana an mga negatibo an nahihiling na gibo kan mga opisyal alagad pigmimidbid man ninda an tultol asin matitibay na public servant.
