LEGAZPI CITY- Bagsak sa karsel an sarong lolo makalihis na positibong makuwaan nin manlain-lain na klase nin badil asin mga pampasabog sa isinagibong search warrant implementation kan mga otoridad sa barangay Brgy. Talisay, San Fernando Masbate.
Binisto an naarestar na suspek na si Dencio Ramiso, 75-anyos na residente kan nasabing barangay.
Sa intrevista kan Bombo Radyo Legazpi kay Pol. Capt.Niño Aquiatan an hepe kan San Fernando PNP, isinagibo an operasyon kasunod kan nangyaring engkwentro sa pagultangan kan mga suldado asin miyembro kan New People’s Army kan nakalihis na Oktubre 12 kung sain wara man nin nairehistro nairido.
Segun kay Aquiatan, makalihis an insidente, nagluwas an posibilidad na pigpapatago kan mga NPA an saindang armas sa residente sa lugar nganing marikas na makadulag sa mga nagbabakay na suldado, na sinegundahan man kan nakuang intellegence report.
Narekober sa harong kan suspek an duwang rifle grenade launchers; sarong M203 grenade launcher; hand grenade; sarong caliber .38 revolver, caliber .22 revolver asin manlain-lain na klase nin bala na nakalaag sa sarong itom na bag.
Sa ngunyan, nakakarsel na an suspek na nahahampang sa kasong pagbayolar sa “Comprehensive Firearms and Ammunition Regulation Act” asin Acta Republika numerado 9516 o “An Act Imposing Stiffer Penalties for Certain Violations of Illegal/Unlawful Possession of Explosives.”
Napag-araman na biyanan an suspek ni Mario Esparagera alyas Ka Mayong na komander kan NPA sa Ticao area.
