LEGAZPI CITY – Ikinakigkig kan Department Of Health Bicol an naitala na anom na kaso kan Fireckracker Related Injuries sa rehiyon Bikol sa laog sana nin sarong aldaw.
Segun kay DOH Bicol Center for Health Development Regional Program Manager, Violence and Injury Prevention Program Julie Ann Granadino sa intrevista kan Bombo Radyo Legazpi na nagpoon su surveillance kan petsa 21 asin hale ini sa sampulong sentinel sites ninda sa enterong rehiyon.
Base sa saindang pinakahuring datos na apat an hale sa Camarines Sur, saro sa Daraga asin saro sa Guinobatan, gabos mga lalaki asin kadaklan an nasa 7-12 years old.
4 sa mga ini an nalugadan nin huli sa improvised cannon o boga, saro sa five star asin saro man sa whistle bomb na pararehong pigkokonsiderar na ilegal na paputok.
Pigtaram pa ni Granadino na pararehong sa mata an nagin lugad kan mga biktima kan paggamit nin boga na nakakasulo nin huli man sa impact kaini.
Wara man naputulan sa mga biktima asin naideklara sanang outpatient nin huli ta pararehong laceration sana an mga nagkakuruwa kan mga ini kan maidara sa mga hospital.
Pagirumdom kaini sa mga magurang na ibitaran na magkaigwa nin access an mga aki sa mga paputok nganing maibitaran an paggamit nin ilegal na papautok nin huli ta posibleng maglala pa an pwedeng makuwa kan mga naiirido.
Pangapodan man kan opisyal sa publiko na dae na pagdugangan an bilang kan mga nalugadan nin huli sa paputok na ilegal asin iselebrar na sana an bagong taon na salbado asin kompleto an kamot.
