LEGAZPI CITY — Dakop sa isinagibong pursuit operation kan mga otoridad an suspek na responsable sa pananaksak-gadan sa sarong 50-anyos na lalaki sa Sitio Gumang Barangay Cota na Daco, Gubat, Sorsogon.
Base sa impormasyon gikan sa Gubat Municipal Police, nagsumbong sa saindang istasyon si Brgy. Kgwd. Salvador Fedillaga katakod kan nasambitan na insidente kun sain pigsasabing pinagsasaksak kan suspek na nabistong si Romeo Belaro alyas Boboy an biktimang si Gregorio Buenaobra na parehong residente kan nasambitan na lugar.
Sa imbestigasyon kan pulisya, nagluluwas na buyong si Belaro kan isagibo an krimen na nagresulta sa pagkagadan ni Buenaobra.
Idinalagan pa an biktima sa ospital alagad idineklarar ining dead on arrival makalihis na magsapar nin multiple stab wounds sa saiyang hawak.
Sa presente, nasa kustodiya na kan nasambitan na pulisya an suspek ngani na kahampangon an kasong isasangat kontra saiya.
