Gadan an limang katawo, kabale an tulong joven, sa sarong suicide bombing na tuminarget sa sarong army school bus sa Balochistan, Pakistan.
Segun sa mga awtoridad, labi 40 estudyante an nakahiling sa insidente asin pirang iba pa an nalugadan.
An bus an pasiring kuta sa sarong army-run school kan mangyari an pagsabog.
Mahigot na kinondena kan Pakistan military asin kan Prime Minister kan Pakistan na si Shehbaz Sharif, an nasabing pag-atake asin inakusaran an mga “Indian terror proxies” bilang mga responsable sa insidente.
Bilang kasimbagan, ipigdoon kan India na wara sindang kinaaraman sa karumaldumal na paggadan asin inapod ining sarong taktika kan Pakistan nganing ilihis an atensyon hale sa saindang sadiring mga isyu.
Bilang lakdang man an nag-expel an India nin sarong opisyal kaini hale sa Pakistan High Commission sa New Delhi, asin kasunod na nag-expel man an Pakistan nin sarong opisyal hale sa Indian High Commission sa Islamabad.
Padagos an piggigibong imbestigasyon kan mga awtoridad nganing maaraman an mga may kagibo sa brutal na pag-atake.
