Nakatalaang bumiyahe pasiring sa Vatican an tulong Pilipinong cardinal nganing makibale sa pagpili kan masunod na Santo Papa, kasunod kan pamamaaram ni Pope Francis.
Kinababalehan ini ninda Luis Antonio Cardinal Tagle, Catholic Bishops Conference of the Philippines (CBCP) president asin Caloocan City Archbishop Pablo Virgilio Cardinal David, asin Manila Archbishop Jose Cardinal Advincula.
Afuera sa pagpili kan masunod na Santo Papa, piglalaoman mang makikibale an tulong Filipino cardinals sa funeral kan namaaram na Santo Papa.
Sa sarong mensahe hale sa CBCP, pigtawan doon digdi na an magiging biyahe kan mga Filipino cardinals pasiring sa Rome an nagpapahiling kan saindang commitment nganing magtaong honra asin pahalagahan an legasiya ni Pope Francis.
Nagpapahiling man suboot ini kan saindang pagpapahalaga sa solemn ceremonies na nakatalaan sa Vatican.
Piggiit kan CBCP na an saindang presensya sa importanteng okasyon an repleksyon bako sana kan saindang personal na pagrespeto sa namaaram na Santo Papa kundi kan pagluluksa kan bilog na Catholic community.
Segun sa CBCP, piglalaomang aktibong makikibalae an tulong Pilipinong cardinal sa paparaning papal conclave nganing i-elihir o pilion an masunod na Santo Papa na magigin lider kan simbahan.
Afuera sa pwedesir sindang bumuto, posible man na mapili an sisay man sa sainda na masunod na magin pinakahalangkaw na lider kan Catholic faith.
Gabos na tulong Filipino Catholic leaders an hinirang ni Pope Francis nganing magin parte kan Sacred College of Cardinals.
