LEGAZPI CITY- Pighahanda na an kasong isusunad kontra sa mga suspetsado na naaktuhan na nagagamit nin marijuana sa Busay Falls sa banwaan kan Malilipot, Albay.
Segun ki Police Captain Alex Alcantara, officer in charge kan Malilipot Municipal Police Station sa intrevista kan Bombo Radyo Legazpi na kaibanan sa mga nadakop an sarong menor de edad na nai-turn over na sa pangangataman kan Department of Social Welfare and Development.
An duwa pa sa mga suspek an nasa kustodiya ngunyan kan Malilipot Municipal Police Station.
Nagluwas sa inisyal na imbestigasyon na mga dayo man sana sa lugar an nasabing mga suspetsado.
Napag-araman na bako ini an enot na bes na igwang nadakop na nagagamit nin iligal na droga sa nasabing pasyaran kaya sinabi ni
Alcantara na mahigot an pigigibong monitoring kan mga otoridad.
Katakod kaini, nagpatanid an opisyal sa publiko na dae mapundo an mga kapulisan hasta sa dae napapanimbag an padagos na mga naiimbwelto sa illegal drug activities.
