LEGAZPI CITY- Arestado an tulong drug presonalities sa ipigkasar na buy bust operation kan mga otoridad sa sarong drug den sa Ligao City Albay.
Pinangenotan an nasambitang operasyon kan Philippine Drug Enforcement Agency (PDEA) Albay Provincial Office katuwang an PDEA Legazpi City Office asin Ligao City Police Station, City Drug Enforcement Unit.
Nadakop an tulong suspek sa Purok 1, Brgy. Mahaba, Ligao City, Albay kun saen narekober digdi an maabot sa 13 pidaso kan sachet kan shabu na may timbang na poko mas umenos 15 grams na nagkakantidad nin Php 82,500.
Narekober pa sa mga ini an mga non drug items kabale na an kwarta na ginamit sa buy bust, 3 lighter, 3 aluminum strips, playing card box asin gunting.
Segun kay Noe Briguel, an Philippine Drug Enforcement Agency (PDEA) Albay Provincial Office head, nasa duwang bulan na nindang pigmomonitor an drug den maintainor mantang an duwa pang mga bisita kaini an aktwal man na nadakop sa ipigkasar na operasyon.
Sa ngunian nahahampang an mga suspek sa kasong pagbalgar sa Section 5, 6, 7,11,12 asin 15, Art. II kan RA 9165 o an Comprehensive Dangerous Drugs Act of 2002.
