LEGAZPI CITY – Nagtetenir pa sa sarong compound sa Guinobatan, Albay an tulong coronavirus (COVID-19) positive na ipigsairarom sa total lockdown.
Inasegurar ni Mayor Gemma Ongjoco sa intrevista kan Bombo Radyo Legazpi na pigmomonitor man an kondisyon kan mga ini asin mismong an mga ini an nagtataram na maray an kondisyon.
Nakatalaan nang isairarom sa ikatulong swab test an enot na personang nakumpirmar na positibo sa nasabing banwaan asin laom na magnegatibo naman.
Segun ki Ongjoco, nagpapahiling nin dakulang tsansa na makarecover an mga nasabing persona urog na asymptomatic na.
Mismong an mga ini naman suboot an naghagad na ireserba na sana an isolation ward kan ospital sa mga pasyenteng mas grabe an kondisyon.
Mientras tanto, inako ni Ongjoco na padificilan ngonyan an suplay nin bagas na naglalaog sa banwaan huli ta warang NFA rice asin naglalaom sana sa commercial rice.
Enot na bugso pa sana kana bagas an ipigtao alagad kulang pa, magin an mga delata.
Posibleng abuton pa suboot nin duwang semana antes na masuplayan giraray kan government rice huli ta nakapila pa an request kan banwaan.
