LEGAZPI CITY-Sinita asin ipinasarado kan Bureau of Internal Revenue (BIR) an mga dispensing pumps kan 25 sa 65 na gasolinahan sa Luzon makalihis na dai nakapasar sa fuel marking testing sa enot na tulong aldaw kan saindang mahiwas na operasyon.
Segun ki BIR Commissioner Charlito Martin Mendoza, katuyuhan kan nasabing lakdang na maaraman an mga leaks sa koleksyon nin buwis asin maprotehiran an mga honestong negosyo laban sa bako patas na kompetisyon sa sektor nin petrolyo.
An operasyon nagpoon kan Agosto 17, 2026, sa pakikipagtabangan kan Bureau of Customs (BOC) asin sarong awtorisadong service provider na nagkokondusir nin pag-eksamin sa mga sample nin gasolina, krudo, asin gas.
An mga apektadong produkto isinairarom sa imbentaryo asin pagselyo mantang naghahalat kan huring resulta kan kumpirmasyon na pag-eksamin susog sa mga eksistidong mga panuntunan.
Kun mapatunayan na dae nagsusunod, mapataw an bureau nin magkakanigong buwis, multa, asin iba pang legal na aksyon sa mga nagbabayolar na establisimiento.
Sinabi man kan ahensya na bako ining one-time activity asin plano nindang ipalakop an kampanya sa iba pang rehiyon sa bilog na nacion.
