LEGAZPI CITY—Karsel an bagsak kan sarong joven na lalaki makalihis na maimbuelto sa pagpapabakal nin droga sa ginibong buy-bust operation sa Tiwi, Albay.
Binisto an suspek na si alyas “Choi”, 24-anyos, residente kan nasabing lugar asin nakalista bilang Street Level Individual sa mga personang dawit sa illegal na droga.
Naarestar ini sa pinagsarong pwersa kan Tiwi Municipal Police Station asin Philippine Drug Enforcement Agency Regional Office 5, makalihis na magpabakal nin sarong pidasong medium heat-sealed transparent plastic sachet na may laog nin white crystalline substance na pigtutubudang shabu.
Narekober man sa suspek an buy-bust money, sarong coin purse na may laog nin kwarta na may manlaen-laeng denominasyon, duwang pidaso nin medium-sized heat-sealed plastic sachets may laog nin pinamara na dahon kan marijuana, duwa pang medium na heat-sealed plastic sachets na may puting pulbos na pigtutubudang shabu asin sarong unit nin motorsiklo.
Pigkarkulo na maabot sa 0.90 gramo nin pigtutubudang shabu an nakumpiskar sa nasabing person na may market value na P3,150 asin pig-estimar na 0.3 gramo nin pinamarang dahon nin marijuana na may street value na P1,500.
Nahahapang an suspek sa kasong pagbalgar sa Republic Act 9165 o Comprehensive Dangerous Drug Act of 2002.
