LEGAZPI CITY — Gadan an duwang katawo na pinagtutubudang miembro kan rebeldeng grupong New People’s Army (NPA) sa nangyaring bakbakan sa pagultangan kan tropa kan gobierno kasubagong maagahon sa Barangay Buri, Mandaon, Masbate.
Segun ki Col. Paul Regencia, tagapagtaram kan 9th Infantry Division kan Philippine Army sa intrevista kan Bombo Radyo Legazpi, nagsasagibo nin monitoring an mga soldados sa provincia kan Masbate tangarig madetermina an mga lugar na pwedesir na mapabali sa election hotspots kan makasabatan an pigkakarkulong nasa pitong mga rebelde.
Nagdurar man nin haros limang minuto an ribayan nin putok antes magdulag an mga suspetsado.
Afuera sa duwang nagadan, narekober man sa pinangyarihan kan engwentro an sarong M16 assault riffle, sarong caliber .45 pistol asin nagkapirang personal na gamit kan mga rebelde.
Sa presente, nagpapadagos pa an pursuit operation kan mga otoridad kontra sa mga nakadulag na NPA huli ta may traces pa suboot na bako sana an nasambitan na grupo an nag-o-operate asin naghihiro sa banwaan.
Mientras tanto, sienerto man ni Regencia na nagtetenir na naka-alerto an mga soldados sa posibilidad na liwat na maghatod nin kariribukan an local communist terrorists sa Bicol region.
